Franz Gunnarsson skrifar.   Sýnishorn neðst á síðunni.

Þurlur á sveimi yfir strætum New York.

 
Frumgerðin

Þú ert Alex Mercer sem vaknar upp í New York með gífurlega öfluga eiginleika en mjög götótt minni um fyrra líf. Þú ert meðvitaður um að eitthvað hræðilegt er að gerast. Þú ert staðráðinn í að komast að sannleikanum hvað sem það kostar. Þú ert frumgerð í líffræðilegri tilraun með vírus sem gerir þig að vopni sem leynilegar deildir innan hersins vilja ná. Til að komast að sannleikanum Þarf Alex að heyja stríð við þessar deildir hersins með öllum tiltækum ráðum og púsla saman minningum um fyrra líf.
 

Alex tekinn að umbreytast gangandi um götur New York.

Alex er mjög öflugt líffræðilegt vopn þegar hann vaknar og í gegnum leikinn getur hann bætt enn frekar alla þá eiginleika sem búa innra með honum. Fyrst má nefna að hann getur hlaupið upp og niður byggingar og svifið langar vegalengdir og hlaupið ótrúlega hratt. Einnig getur hann umbreytt sér og orðið að líffræðilegu vopni. Hendurnar breytast í stjaka, hamra eða sveðjur til að slátra öllu því sem á vegi hans verður ásamt nokkurs konar svipu sem hann nýtir til að ná í manneskjur og farartæki úr fjarlægð. Alex er ótrúlega sterkur og því getur hann lyft bílum og öðrum þungum hlutum sem hann fleygir svo langar vegalengdir. Til að verjast árásum getur Alex breytt hönd í skjöld eða brynvarið sig með sterkum hjúp.
 
Vefur leyndarmálsins

Alex hefur þá eiginleika að taka á sig mynd karaktera í leiknum og getur sogað í sig minni þeirra. Með því fær hann glefsur í formi myndbanda sem tengja sögufléttuna saman. Þetta er einstaklega hress aðferð til að koma sögunni til skila og einnig getur Alex þá spókað sig um óáreittur innan um óvinina og komist inn í virki þeirra og gert árás innan frá. Að taka á sig mynd hátt settra hermanna eykur kraftinn og færnina hjá Alex til að berjast.
 
Byssur og þungavopn

Alex getur notað skotvopn sem hermennirnir bera en þó er betra fyrir hann að stela skriðdrekum og þyrlum til að nota í orrustum. Það er einstaklega flott hvernig Alex notar fimleikahreyfingar til að ná valdi á farartækjunum. Þessi viðbót á vopnanýtingu gefur leiknum mikla innspýtingu í spilun.
 
Vírus breytir New York

Leikjaheimurinn er opinn og mjög lifandi. Eftir því sem líða tekur á leikinn eru heilu hverfin í borginni orðin sýkt af veirunni og breytist andrúmsloftið því mikið eftir því hvar Alex er staddur. Í sýktu hverfunum er allt á öðrum endanum þar sem herinn berst við sýkta borgarbúana og þá óvætti sem vírusinn hefur leyst úr læðingi. Hræ- gammar svífa yfir og mikill drungi fylgir.
 

Alex horfir yfir New York.

Leikurinn er ekki sá flottasti á markaðnum en bætir það upp með frábærri spilun. Það er nóg af verkefnum til að leysa en leikurinn hefði verið fullkomnari ef fjöldaspilun hefði verið í boði. Hljóðvinnslan er mjög góð og í heildina litið stendur Prototype undir þeim væntingum sem ég gerði til leikjarins.
 
Hvað verður um Alex?

Ég tel það mjög líklegt að framhald af leiknum verði gert að því gefnu að Prototype seljist þokkalega vel. Vangaveltur hafa verið um að Prototype endi í trílógíu. Fram- leiðandi leikjarins er alla vega með mjög góðan efnivið í höndunum og sagan getur haldið áfram. En nóg um það, ef þú hefur ekki spilað þennan leik nú þegar mæli ég eindregið með því að þú gerir það. Prototype rokkar.

FORSíÐA    MERIRI TÖLVUGAGNRÝNI